24. septembari 2024
UKA2024/18
Uunga siunnersuut Kalaallit Nunaanni aningaasanik nuussinermi paasissutissat ilanngullugit
nassiunneqartarnissaannik inatsisip allanngortinneqarnissaa pillugu inatsisissatut siunnersuut.
(Aningaasaqarnermut Akileraartarnermullu Naalakkersuisoq)
Siullermik Siumumiik Naalakkersuisut qutsavingerusuppagut sulingasuarsimanerannut,,
Inatsisartullu siulittaasoqarfiata aalajagiiffissatut siunnersuutit akueripallussimaneranut.
Siumumiik pingaartipparput aningaasaqarnermut inatsisitigut peqqussutsinnut
malinnaajuarnissarput. Malinnaanngikkuttami EU-p avataaniittutut inissassangaluarutta
niueqatigiinnermi, aningaasanik nuussisarnikkut atuisunut ilungersunartorsiortitsilersinnaangatta.
Inatsisip akuerinissaa pisariaqarpoq, nunani tamalaani ineriartorneq tassunga ingerlammat, EU- lu
aningaasanik peqquserluttoqarsinnaaneranik akiuineranut ilaallutik.
Inatsit una akuerigutsigu, inatsisit atuutereersut sukaterneqassapput, tassanilu annerusumik
aningaasat krypto- nik taaneqartartut soorlu Bitcoins ilaatinneqalissallutik, aningaasanik
nuussinermi paasissutissanik piumasaqartalernikkut. Tassa nassiussisoq aammalu tingusisussaq
kikkuunerminnik uppernarsaateqassapput, atornerluinissat, malunnarunnaarsaanissarlu
pinngitsoortikkumallugit.
Siumumiik taamatut oqaaseqarluta Aningaasanut Akileraartarnermullu ataatsimiisitaliamut
suliassanngorlugu ingerlateqqipparput.
Tassunga atatillugu oqaatingilaarusuppara Inatsisitigut suleriaaserput aammalu nunatut
inissisimanerput inerisartariaqaleripput. Tassami Nunarput EU- miik aninikuuvoq, tamanna aamma
ajunngilaq, kisianni ilaatigut unammillernartoqarsinnaavoq. Tamakkiisumik EU- mut
ilaasortaanissaq nunatsinnut orniginanngilaq, tassami Europami nunanut sanilliulluta
allaanerungaarpugut, sorpassuartigut.
Taamaammalli periarfissat allat misissorluarnissaannut uninngassanngilagut. Tassami soorlu
Savalimmiut, Schweiz- lu bi-lateral- mik isumaqatigiissuteqarput, Norge, Island EØS- mut ilaapput,
tamakkiisumik ilaarsortaanatik. Nunatsinni EU- mut suleqateqarnerput nalilersungassaavoq,
pitsaanerpaamik nunatta inissisimanissaa eqqarsaatingalugu, nerippungalu, Naalakkersuinikkut
tamakkua eqqumaffigineqarumaartut aammalu periarfissaappat nutarteriffigineqarnissaanut
aallartitaqarfik suleqatingalugu nalunaarusiorsinnaallutik.
Qujanaq.
Kuno Fencker, Siumut
1