10. oktober 2023
UKA 37/2023
Kalaallit Nunaanni eqqartuussisarnermik inatsisip allanngortinneqarnera pillugu inatsisissatut
siunnersuutip (Inatsisit unioqqutinneqarneranni pinerluttoqarsimaneranik paasiniaanermut
ilaatillugu politiit inunnik sunniiniartartunik atuinerat il.il.) Namminersorlutik Oqartussanit
akuersissutigineqarnissaa
pillugu
Inatsisartut
aalajangiiffigisassaattut
siunnersuut
(Inuutissarsiornermut,
Niuernermut,
Aatsitassanut,
Inatsisit
Atuutsinneqarnerannut
Naligiissitaanermullu Naalakkersuisoq)
Siumup pingaartippaa nunatsinni innuttaasut kikkuugaluartulluunniit toqqissisimasumik
avatangiiseqarlutik inooqataanissaat, taamaammallu inatsisinik atortitsinermut suliassaqarfiup
iluani pitsanngorsaateqarfiureeraluartumi suli pitsanngorsaatissanik iliuuseqaqataanissaq Siumumi
tikilluaqqullugulu suleqataaffigiuarusukkatsigu aallarniutigalugu oqaatigeqqikkusupparput.
Ajuusaarnaraluaqisumik nunatsinni pinerlunnerit pinerlunniarnerillu sakkortusiartorput,
taamaammat siunnersuummi matumani anguniagaasoq, tassalu inunnik sunniiniartartunik
atuisinnaanermut
aalajangersagaqalernissaq
Siumup
isumaa
malillugu
assut
tapersersornartipparput.
Aalajangersakkap pineqartup atuutilersinneratigut isumarput naappertorlugu piffinni
inukikkaluaqisuni imaluunniit innuttaasut akornanni politiinut unnerluutiginninnissamut
sapiuffiusuni annertuumik paasiniaanerni iluaqutaasinnaanera naatsorsuuteqarfigaarput.
Assersuutigalugu ikiaroornartumik anngiortumik eqqussuineq tuniniaanerlu eqqarsaatigalugit
innuttaasut annertuumik toqqissisimanngissuteqarnerat amerlasuutigut politiinut anngunneq
ajornerat tusartuarparput, namminermut pinerliisisoqarsinnaanera aarleqqutigalugu. Tamakku
tamarmik eqqarsaatigalugit inunnik sunniiniartartunik atuilernermi suliat angusaqarfiunerusumik
suliarineqartalernissaat naatsorsuutigineqarsinnaasoq Siumumiit isumaqarpugut.
Taamatut naatsumik oqaaseqarluta siunnersuut aappassaaneerneqartigani
ataatsimiititaliami sukumiisumik suliarineqarnissaa innersuussutigaarput.
Inatsisinut
Anders Olsen
Siumut