29. septembari 2024
UKA2024/31
Kalaallit Nunaanni eqqartuussisarnermik inatsisip, Kalaallit Nunaanni pinerluttulerinermi inatsisip,
qularnaveeqqusiisarneq pillugu Kalaallit Nunaannut inatsisip aamma aappariinnerup inatsisitigut
sunniuteqarnera pillugu inatsisip Kalaallit Nunaannut atuutilersinneqarsimasup allanngortinneqarneri pillugit
inatsimmut missingiutip (Eqqartuussivinnut 2024-imiit 27 ilanngullugu ukiunut arlalinnut isumaqatigiissutip
ilaanik naammassinninneq) Kalaallit Nunaanni Namminersorlutik Oqartussanit akuersissutigineqarnissaa
pillugu Inatsisartunut aalajangiiffigisassatut siunnersuutt
(Inuussutissarsiornermut, Niuernermut, Aatsitassanut, Inatsisit Atuutsinneqarnerannut
Naligiissitaanermullu Naalakkersuisoq)
Siullermik Siumumiit Naalakkersuisut, folketing- imilu ilaasortaatitagut qutsavingerusuppagut,
akisussaaffiit kunngeqarfimmit suli tinngummineqartut nutarternissaannut suliaqarnerannut.
Siumumiilli isumaqarpungut, qanorluunnit suli akisussaaffiit kunngeqarfimmiikkaluarpata,
akisussaaqataavugut. Nunatsinnimi pisut, atungassallu eqqumaffingalugit aamma
iliuuseqarfigisussaavagut.
Danmark- imi Naalakkersuisooqatigiit aammalu danskit partiivisa akornanni
isumaqatigiissuteqarsimanermi eqqartuussiveqarnikkut allatigullu inatsiseqarnermut tunngasut
nutarteriffigineqarnissaat aningaasaliiffigisamavaat, tamannalu nunatsinni aamma
eqqartuussivimmi allatigullu sulianut sunniutissaaq. Siumumiillu inuiaqatigiit inatsisitigut
toqqissisimanartumik aammalu tutsuiginartumik atungaqarnissaat sulissutingiuassuarput.
Siunnersuummi qulequttat
Nunatta eqqartuussiveqarfiani
eqqartuussisut marlunngussapput. Sunniutigissavaa
sukkanerusumik, pitsaanerusumillu suliassat suliarineqartarnerannut. Suliassarpassuimmi
qaleriiaalersimasut iliuuseqarfigineqassappata, eqqartuussisumik ilanissaat pingaaruteqarpoq.
Minnerunngitsumillu inatsisitigut isumannaatsuunissamut iluaqutaassalluni.
Eqqartuussisut soraarninngornikut
pisariaqartitsinermi qaaqquneqarsinnaanngussapput.
Inuttassaaleqineq iliuuseqarfiginiarlugu, annertuumik suliassaqartillu
qaaqqusisoqarsinnaanngussaaq, suliassat qaleriaalinnginnissaat pinngitsoortikkumallugu,
sukkanerusumillu sullissinissaq siunertaralugu.
Eqqartuussaasumut nakkutiginnittumut
ataqatigiissaarisumik pilersitsisoqassaaq, taamaasilluni
eqqartuussaasoq inatsisitigut unioqqutitsinngittumik sullinneqarnissaa qulakkiissallugu.
1