9. oktober 2023
UKA2023/38
Kalaallit Nunaanni pinerluttulerinermik inatsisip aamma Kalaallit Nunaanni
eqqartuussisarnermik inatsisip allanngortinneqarnerat pillugit inatsisissatut siunnersuutip
(Digitaliusumik innarliisarnerit akiorneqarnissaannut suliniutit, matumani isumapiloqarneq
tunngavigalugu tatiginnilersitsiniaanerup, grooming-ip, inerteqqutinngortinneqarnera,
meeqqamik atoqateqarnerup pinngitsaaliinermut naligiissinneqarnera, malunnaarsaarluni
atoqateqarneq, upperisarsiortut aqutsisuisa atoqateqarniarlutik inuup pisariaqartitsineranik
imaluunniit pinngitsuuisinnaannginneranik atornerluineri il.il.) Kalaallit Nunaanni
Namminersorlutik Oqartussanit akuersissutigineqarnissaa pillugu Inatsisartut
aalajangiiffigisassaattut siunnersuut
Inuutissarsiornermut, Niuernermut, Aatsitassanut, Inatsisit Atuutsinneqarnerannut
Naligiissitaanermullu Naalakkersuisoq
Siullermik Siumumiik Inuutissarsiornermut, Niuernermut, Aatsitassanut, Inatsisit
Atuutsinneqarnerannut Naligiissitaanermullu Naalakkersuisoq qutsavingerusupparput,
pinerlunnermut aammalu eqqartuussisarnermut inatsisit allanngornissaannut siunnersuutaannut.
Imaappormi, Inatsimmi allaqqanngippat inuk pineqaatissinneqarsinnaanngilaq, taamaammat
pingaaruteqarpoq, digital- imik, minnerunngittumillu nittartakkatsigut periarfissarpassuit
aqqutingalugit periusipalaat assigiinngittut pinngorarsinnaaneri eqqarsaatingalugit,
pinerlunnermut inatsisitta sukkasuumik, sukumiisumillu nutartertuarsinnaanera
pisariaqarluinnartoq.
Siumumiik isumaqarpugut, pinerlunnermut Inatsit suli Inatsiseqarnermut
ministeriaqarfimmiitillugit, Naalakkersuinikkut Naalagaaffimmut suleqatigiinneq eqaannerusumik,
aaqqissuulluagaanerusumillu ataqatigiissarneqartariaqalertoq. Tassami Inatsisinik
pineqaatissiinermut tunngasuni, inuiaqatigiilerinermi misissuinerit pisariaqartarput, nunanilu allani
pissutsit. Inatsisit qanoq ineriartorneri malinnaaviginissaat aammalu qanoq ineriartorneri
pisariaqartarpoq aamma nalilersuutaalluarsinnaasarmata. Inatsisillu allanngoreerneranni sunniutit
aammalu pitsaaqutit, unammillernaqutaasinnaasullu qulaajarneqarsinnaasaramik.
Siumumiik isumaqarpugut, assersuutigiinnarlu Straffelovsråd (Pillaasarnermut siunnersuisoqarfik)
misissuitillugu aammalu nalilersuutinik politikerinut atungassanik suliaqartillugit Kalaallit Nunaat
sulianut ilanngunneqarsinnaasassasoq. Taamaasilluta nalilersuilluarnerit, nunarpullu
ilanngunneqarsimasoq, politikeritut nalilersuilluarsinnaalluta aaliagiiffigisarsinnaassangaluaratsigu.
1