7. november 2023
UKA23/36
Kalaallit Nunaata eqqaani imartani aningaasaqarnikkut immikkut oqartussaaffigisani avatangiisit
illersorneqarnissaat pillugu inatsisip allanngortinneqarneranik inatsisissatut siunnersuummik
Namminersornerullutik Oqartussat ilaliinissaat pillugu Inatsisartut aalajangiiffigisassaattut siunnersuut.
(Nunalerinermut, Imminut Pilersornermut, Nukissiuutinut Avatangiisinullu Naalakkersuisoq)
Siullermik Inatsisissatut siunnersuummut Siumumiit qujavugut imatullu oqaaseqassalluta:
Siumumiik pingaartipparput avatangiisitta mingutsinneqannginnissaa pillugu suliniarnerit assigiinngitsut
mingutsitsisinnaanermut annikillisaanermik siunertallit, siunertaq pitsaasuuppat tamatigut
tapersersortuarnissaa pingaartitaraarput, tassami issittumi najugaqarnerput avatangiisitsinnik
sunnertiasumiinnera eqqarsaatigalugu kissaatiginartaqimmat mingutsitsinerit suugaluartut sapinngisamik
pinaveersaartittarnissaat piusariaqarluinnartut isumaqaratta
Naalakkersuisut siunnersuutaanni Nunatta eqqaani imartat aningaasaqarnikkut immikkut
oqartussaaffigineqartut mingutsinneqannginnissaat pineqarpoq, tamanna siusinnerusumi inatsisartut
aalajangersimaneranni aallaaveqartoq pineqarpoq.
Naalagaaffiit Peqatigiit imarsiorneq pillugu suleqatigiiffiata ataani uuliap oqimaatsup issittup imartaani
atorneqarnissaanut assartorneqarnissaanullu inerteqqummik akuersisimanera tunngaviuvoq, tamatumalu
kinguneranik siunnerfiuvoq uulia oqimaatsoq atorneqarunnaassasoq.
Tamanna ilaatigut RAL-imut tunngatillugu paasissutissat malillugu orsussamut ikummarsaatikitsumut
nuunnissaa atuinerunermik kinguneqartussaasoq ersersinneqarpoq, ilaatigut
aningaasartuuteqarnerulernissamik kinguneqassasoq, tamanna atuisut akiliuteqarnerunissaanik
kinguneqartussaavoq, malitsigissallugulu qularnanngitsumik assartuinerup akisunerulernissaanik
kinguneqassalluni, tassami nalunngilarput assartuineq akitsortillugu sunut tamanut tuniluussinnaasartoq
naggtaagullu siammasissumik akit qaffaateqarneranik kinguneqartarluni
Kisiannili avaqqussinnaanngilarput MARPOL-imi isumaqatigiissut malillugu uuliap kinertup
atorneqarunnaarnissaa aalajangiiffigineqarsimammat,tamatumallu allatut ajornartumik malitsigisassaasa
ilaat uani pineqarluni
Siunertaa paasisinnaalluarparput uuliallu akia nikerartuartuummat naatsorsoruminaappoq qanorpiaq
sunniutissat isikkoqassanersut, tassami ilisimavarput piffissami aggersumi uuliap akia
qaffanneqartussaasoq, qanorpiarli qaffaateqassanersoq maannakkorpiaq akiuminaappoq oqareernittut
uuliap akiata nikerartuartuunera pissutaalluni.
Ilanngullugu maluginiarparput tusarniaanermi tusarniakkat amerlasuut tusarniaaffigineqarsimasut
akissuteqartorlu ataasiinnaasimavoq taannalu siunnersuummut tapersiilluni oqaaseqarsimalluni.
Avatangiisitta isumannaatsuunissaa mingutsitseratarsinnaanerullu ingalassimaneqarnissaa pingaartillutigu
siunnersuut tunngaviatigut taperserparput, siunertaa ajunngitsuusoq takusinnaagatsigu.